◾बोधकथा :- कर्म हीच पूजा | रामकृष्ण परमहंस

एकदा एक बाई रामकृष्ण परमहंसाकडे आल्या आणि म्हणाल्या , " मला या संसाराचा विट आला आहे . मुलं मोठी झाली. आता... प्रपंच सुटेल असे वाटले. पण... नातवंडांच्या प्रेमात पडले . रोज त्याला सांभाळावे लागते . परंतु आता घर सोडायचा विचार आहे . " 

रामकृष्णांनी विचारले ,

 " घर सोडून तुम्ही काय  करणार ? "

त्या बाई म्हणाल्या , 

" गंगेच्या तीरावर एक झोपडी बांधणार . त्यात श्रीकृष्णाची मूर्ती बसविणार . रोज त्या मूर्तीची पूजा करणार . कृष्णाला नेवैद्याने जेवू घालणार . कृष्णाला झोपेतून उठविणार, आंघोळ घालणार."

परमहंसांनी विचारले,

" श्रीकृष्णाची मूर्ती दगडाची असणार ना ? "

तेव्हा त्या बाई ' हो ' म्हणाल्या . रामकृष्णांनी विचारले ,

 " आपण दगडाच्या मूर्तीत श्रीकृष्ण पाहणार ? " 

त्या बाई ' हो ' म्हणाल्या . 

त्यावर रामकृष्ण म्हणाले .  "आपण दगडाच्या मूर्तीत श्रीकृष्ण पाहणार , मग नातवंडामध्ये श्रीकृष्ण का पाहत नाहीत ? श्रीकृष्ण समजून नातवंडाला जेवू घाला. श्रीकृष्ण म्हणून आंघोळ घाला. श्रीकृष्ण म्हणून त्याला झोपवा. "  

तुम्ही तुमच्या नातवंडानाच तुमचा श्रीकृष्ण समजून वागा. मनातला भाव चांगला ठेवा म्हणजे तुम्हाला सर्वत्रच भगवंत दिसेल. आवश्यक नाही मुर्तीतच देव पाहणे. तुम्ही तुमच्या नित्यकर्मात पण देवाचे दर्शन घेऊ शकता.

 

🔅तात्पर्य 🔅

नित्य कर्मामध्ये भगवतभाव ओतला की... ते कर्म नाम साधनेच्या दर्जाचे होते व तेच कर्म पूजा ठरते.

______________________________________________

टिप : -{ लेख कसा वाटला कमेंट मध्ये नक्की कळवा }- सदर लेख आवडल्यास नक्की शेअर करा ✅